教育工作嘅基本目標，係將知識傳授俾下一代，對整體社會嚟講，教育係一項神聖嘅任務。不過，自從本港決心發展大專教育，教育竟然漸漸變成大專院校嘅搖錢樹。由於資助嘅大專學額一直都供不應求，自費嘅課程需求極大，呢啲課程收費昂貴，校方可以得到豐厚嘅利潤，於是各校爭相開辦自費課程，大量招攬學生，結果自然流弊叢生。
其實，發展教育產業及開辦自費課程，都係無可厚非，環顧歐美等教育先進國家都係咁做，但發展教育產業，唔係盲目咁去發展，我哋唔應該容忍院校放棄教育質素及原則，盲目咁去濫收學生，亦都唔能夠容許院校當成一盤生意去做，發展成為文憑工廠。今日原議案及各項修正都就大專教育提出好多建議，我認為大多數都好有建設性，我唔打算多講，而我想就重振教育質素嘅角度，特別講下中小學嘅教學問題，我同好多朋友對呢個問題都有好多強烈嘅意見。
本港中小學嘅問題真係多蘿蘿，而最失敗嘅地方，就係將好多學生教到無晒興趣讀書。事實上，本港嘅教育開支十分龐大，喺今個財政年度就佔經常性開支22%，係政府最大嘅開支，既然落重本，教學質素理應會好正，點知剛好相反，有能力嘅家長都想子女逃離本港嘅教育制度，正如有人話，高級官員特別喜歡送仔女去外國讀書。我同好多朋友都有同樣嘅經歷，仔女喺本地學校讀書讀到無晒興趣，但當送去國際學校或外國讀書，仔女就生翻晒，唔單止喜歡返學，仲有好多考到優異成績。呢個現象其實好值得我哋去思考?
有好多人認為，問題出喺本港嘅教育制度上。自從本港推行9年免費教育，政府要投放大量資源，教育部門就負責統籌教育制度，實行中央統一計劃，對課程內容、語文政策、師資要求及考試制度等，都有嚴格嘅規管，權限極為廣泛，但今日教育部門嘅中央計劃，已難以追及社會急速嘅轉變。同時，近年教育部門又不停提出改革，改革原意係好，但好多時推行過於急速，又無處理好前線教師嘅壓力，導致改革好多時都無功而還，反而令到本港教育問題越來越複雜。
至於點樣解決目前嘅困境? 我有一位教育界朋友就話，最好唔好管咁多，叫教育部門官員一齊去前線教書。呢位朋友可能一時戲言，但拆牆鬆綁可能真係一個好辦法，我認為政府應該重新研究整個教育制度，起碼都對現行制度作出一定程度嘅簡化，俾辦學團體及學校一定程度嘅自主空間。
另一方面，曾有學者認為，本港中小學課程過於沉重，應該考慮刪減部分課程內容。其實，自從推出中學文憑課程，有學校發現三年制高中，不能將所有課程教完，竟然自行喺假期為學生加時補課，學生老師都話補課補到癲。事實上，現今世界已進入資訊爆炸嘅年代，人類現有嘅知識可以好快變得過時，俾新嘅知識取代，所以與其填鴨式灌輸知識，不如刪減部分課程，將剩餘嘅時間，用於訓練學生嘅智慧，教識學生終身學習嘅能力，對學生會更有幫助。
除咗課程外，我認為仲有一樣嘢應該要刪減，就係功課。我哋唔係專家，但係從家長角度嚟睇，繁重嘅功課一定係學生失去學習興趣嘅主要原兇，學生每日都要花上幾個鐘頭去做功課，壓力自然巨大，但最弊功課多根本唔代表成績會好，本港大部份學校嘅功課都好多，理應大部份學生都有好成績，但事實根本唔係咁樣。 近日，法國總統提倡唔好將功課帶返屋企做，呢個建議引起唔同嘅爭議，相信嘅香港亦難以做得到零功課，但本港如果可以好似上面所講，減少學校課程內容，剩餘時間就可以俾學生做部份嘅功課，咁就可以減少在家中做功課嘅時間，達到減少功課嘅目的。
總括而言，令學生重拾學習嘅興趣，係重振本港教育質素嘅一大關鍵，而我見過唔少例子，喺本港無晒興趣讀書嘅學生，喺外國重拾學習嘅樂趣，成績更加突飛猛進。我希望有關方面，能夠認真思考有關嘅建議。