香港過去一直對人口政策嘅問題，採取視而不見嘅態度，導致社會出現種種流弊。今次嘅施政報告終於唔再迴避，主動提出人口容量嘅問題，並強調要做好外來人口嘅管理工作。
施政報告今年喺引言部份指出，香港空間有限，人口和其他政策必須考慮容量問題，並且強調要做好外來人口嘅管理工作，優先發展港人嘅潛能，並發揮青年、婦女和較年長人士嘅才能，提升勞動力和生產力，做到人盡其才，並在有需要時以外來人口補充不足。
雖然，施政報告無明確表示將會制定人口政策，但當中嘅意思已經十分明確，實際上已經係表明政府喺制定政策時，會將人口問題列入為其中一個重要嘅考慮因素。我認為，政府已經行出正確嘅第一步，下一步就要制定一套明確、清晰嘅人口政策，俾政府制定教育、房屋及醫療等政策時，有一個客觀、具體嘅考慮準則。我舉一個簡單嘅例子，當政府發現雙非兒童喺未來數字會陸續來港，各個政府部門喺制定政策或服務方案時，就必須要將有關因素計算在內。
漠視人口政策而衍生出來嘅問題，其中一個例子就係任由雙非孕婦來港產子，除咗令到本港產房出現混亂外，長遠更會對社會各項服務，例如教育及房屋，構成好大嘅壓力。據統計所得，雙非兒童已多達22萬人，我認為，政府應該主動出撃，最好調查雙非兒童嘅去向，了解佢哋打算幾時嚟香港定居，制成一個資料庫，以便各部門制定政策時，可以掌握更清楚嘅人口變化，否則雙非問題分分鐘成為社會另一個計時炸彈。事實上，過去政府根本就無研究過有關嘅問題。
至於外來人口嘅管理工作，我過去已經講過好多次，除咗雙非問題外，持單程通行證來港人士嘅問題，亦必須要正視。由98年至2011年，持單程證來港嘅人數已超過660,000人，佔香港總體人口接近一成，佢哋絕大部份係基層市民。他們係以家庭團聚理由來港，係唔能夠拒絕佢哋來港嘅申請，但喺規劃同準備工作上，香港係可以好得更加好，例如提出更多具針對性嘅工作培訓或輔導服務，至少要避免再出現天水圍悲情城市式嘅錯誤規劃。
另外，我想講下貧窮問題。貧窮問題困擾咗香港好多年，新一屆政府已經率先成立扶貧委員會，並把制定「貧窮線」列為其中一項首先工作。我係支持成立扶貧委員會，並且制定「貧窮線」，作為扶貧措施嘅標準，令各項扶貧措施都可以根據呢個「貧窮線」而制訂，亦都期待將來扶貧嘅工作，可以做得更加到位。
引致貧窮問題嘅其中一個原因，就係香港人口老年化。正如施政報告所講，30年後，香港65歲及以上的長者將由94萬人急升至256萬人，政府必須及早處理社會人口老化而帶來衝擊。我一直認為，強積金只係針對在職人士嘅退休保障制度，強積金亦有本身嘅缺點，就係對低收入及快將退休人士，唔能夠提供足夠保障，所以政府應該喺強積金以外，研究制定一個專門針對低收入嘅退休保障方案，一方面補強積金不足，亦都解決將來人口老化帶來嘅壓力。
至於其他嘅福利問題，我認為要優化綜援制度下嘅「自力更生支援計劃」，鼓勵有能力嘅受助人自力更生，重過新生活。除咗考慮提高計劃中豁免計算入息嘅最高限額外，仲可以考慮減低扣款嘅金額，要受助人將多出嘅金額存入指定戶口，當受助人有實際需要時，先至可以提取出來用，以加強計劃嘅鼓勵性。