本港近日為咗擴建堆填區嘅問題而爭論不休，老實講，今時今日我哋仍然被逼用堆填嘅方法去處理垃圾，就係因為香港管理廢物嘅政策同好多其他政策一樣，自從回歸以來一直原地踏步，結果而家社會就嚐盡苦果。我哋成日話要學台灣，但其實台灣以前管理廢物嘅工作比香港落後，甚至會嚟香港吸取經驗，後來台灣下定決心，引入生產者責任制政策，並喺二千年實施廢物按量收費，11年間減廢65%，而家竟然成為香港嘅學習對象。
香港被逼要擴建堆填區，係無辦法之中嘅辦法，亦都警醒我哋，一定要下定決心引入新嘅廢物管理政策，等我哋可以早日減少堆填數量。事實上，環境局早前公佈咗《香港資源循環藍圖2013-2022》，提出推動以「惜物減廢」為主題嘅廢物管理政策，建議喺2022年前，把都市固體廢物人均棄置量，由現時嘅每日1.27公斤減至0.8公斤，同時加入焚化技術處理垃圾，並擴大垃圾回收嘅規模。
政府嘅目標係要喺10年內減廢4成，外界擔心目標訂得太過進取，但過去台灣及南韓都同樣能夠10年內大幅減廢，佢哋做得到，只要我哋決心去做，一樣可以做得到。當然，如果我哋嘅社會仍然只顧鬥爭，唔理社會及經濟嘅改革，任由社會繼續原地踏步，香港遲早都難免會變成臭港！
環境局局長近日透露，政府即將成立一個可持續發展督導委員會，負責研究及推動回收業長遠嘅發展，包括考慮以現時嘅環境及自然保育基金，資助推動回收業嘅發展計劃，長遠更可能成立回收基金，提供經常性補助。我好高興政府有咁嘅決定，政府過去一直任由回收業自生自滅，回收業長期面對經營困難嘅問題，主要因為經營成本高，包括租金貴及人手需求大，而回收到嘅物料，大都只能平價出口外地，喺咁情況下回收業根本難以得到發展。
政府而家終於醒覺，唔再堅持所謂大市場嘅方針，放棄過去唔肯用公帑去補貼私營行業嘅傳統做法。坦白講，要回收業呢啲競爭力咁低嘅行業壯大發展，為我哋社會服務，就一定要政府嘅推動及補貼，否則唔可能有乜嘢成績。況且，政府嘅補貼唔係單單資助回收業，而係補貼全港嘅環保工作，因為回收業係有好重大嘅社會職能，實質上係推動廢物循環再造嘅工作，而且亦都能夠創造大量嘅基層職位，就算每年要投入數以億計嘅資源，政府亦應該去做。我希望委員會能夠早日成立，並盡快定出資助嘅範圍及條件，俾回收業界早日開展工作，政府嘅藍圖就有機會得到落實。
另外，我都想講下廚餘嘅問題。目前，根據環境保護署嘅統計，都市固體廢物中竟然有多達4成係廚餘，情況可謂十分驚人，反映出香港人浪費食物已去到令人震驚嘅地步，而且廚餘係廢物中臭味嘅主要來源，對社會構成好大滋擾，亦構成衛生問題。所以，要減少產生廢物，最快有效嘅方法係鼓勵市民減少浪費食物。政府已經推出「惜食香港」運動，推動香人減少浪費食物，近日有宣傳片喺電視中播出，宣傳片拍得唔錯，令人留下深刻印象，但其他活動嘅宣傳效果只係一般。
我認為，要收到最好嘅效果，應該提升運動嘅層次，邀請政府高層加入督導委員會，並帶頭去宣傳惜食香港嘅訊息，特首及司局長亦可以以身作則，制定官員請客時惜食嘅節約原則，同時引導社會討論惜食背後嘅問題，包括浪費、廢物及衛生等問題。事實上，我認為，應該將「惜食香港」運動及減廢文化嘅資訊，列入學校通識科目之中，希望可以直接向學生教授惜食及減少廢物嘅價值觀，因為宣傳活動只能起短期作用，唯有教育先至可以喺學生心中建立長達嘅價值觀，惜食嘅訊息可以持續下去。
最後，我仲想講下堆填區嘅問題。今次堆填區嘅風波，突顯咗全港性同地區性嘅矛盾，大家都明白擴建堆填區係有實際需要，但各區都希望唔好喺我哋個區擴建。其實，全世界都有類似嘅情況，外國政府通常會為受影響嘅地區提供補償，以緩和市民嘅不滿，我哋都可以考慮為受影響嘅地區提供新建嘅泳池、圖書館，甚至減免居民電費及差餉。我希望，政府可以拿出最大嘅誠意，同居民溝通，並盡量做好補償工作，設法減低實際影響，務求可以緩和地區不滿嘅情緒。