香港到底係咪仲係一個安全城市?
喺2012年10月1日，一班港燈嘅員工同家屬搭船去欣賞煙花匯演，點知佢哋嘅船同一艘小輪相撞後下沉，結果導致39人死101人受傷。
喺2011年11月30日凌晨，旺角花園街一列排檔起火焚燒，波及鄰近有大量劏房嘅一座唐樓，當時居民大都正在睡夢之中，結果導致9人死34人受傷。
喺2008年5月1日，一駕載有60多人嘅旅遊巴，行經新西貢公路時，失控撞向迴旋處後再翻側，導致19人死43人傷。
以上嘅個案，全部都係近年發生嘅嚴重事故，每一宗事故都令人觸目驚心，死傷者大都係正在睡夢或休息，亦有人興高采烈準備參加戶外活動，點知突然間飛來橫禍，無端端受傷或喪命。每年《中國城市競爭力研究會》都做好多有關競爭力嘅調查，本港過去多次被評為中國最安全城市，但喺2011、2012年嘅報告中，該會竟然將香港排除於榜外，調查機構認為，香港發生咗花園街大火及南丫島海難兩宗特大事故，所以唔可以列入安全城市榜。
一開始我提到嘅個案都係特大嘅嚴重事故，社會大眾都好清楚，但一啲普通嘅意外，即使有傷亡，社會可能忽視咗。例如近年社會興起單車運動熱潮，原來單車意外越來越嚴重，去年喺頭十個月有2100多宗，比前年上升13%，當中有9人死亡。另一個例子，最近兩年每年都有七、八宗因抹窗而墜樓嘅意外，大部份事主都當場斃命。由此可見，日常生活中，隨時都有死亡陷阱。
根據統計，喺交通意外中，本港每年平均有百多人死亡，約有兩萬人受傷 ; 喺火警中，每年平均有十多二十人死，約有三四百人受傷; 喺工業意外中，每年平均有十至二十多人死，約有一萬四千人受傷; 至於家居意外方面，由於政府無統計，我哋無法知道詳情。
有從事工業傷亡權益嘅朋友指出，自從警方轉用數碼通訊系統，記者不能收聽到警方消息，傳媒報導意外消息亦大幅減少，可能令人以為意外有所減少，但實際上反而係越來越嚴重。同時，政府公佈嘅意外傷亡數字並不齊全或分類凌亂，以至市民不能了解全盤情況，大家可能會低估咗實際嘅意外情況。
至於各類意外成因，首先係市民安全意識鬆懈，喺多場大型火災中，都反映出市民防火意識不足，甚至唔識得點樣逃生。呢點亦反映出政府無做好安全教育，到發生多宗意外之後，先至製作電視短片，教人點樣逃生同埋要帶齊逃生三寶。 另一個原因係城市設施老化或設計有問題，本港有好多早年興建嘅房屋同社區設施日久失修，不斷出現石屎或鋁窗墜下意外，甚至嚴重到出現土瓜灣塌樓慘劇，而舊樓嘅火警好多時同電力裝置老化有關。另外，社會居住模式嘅變化亦直接增加意外嘅機會，最典型嘅例子就係劏房問題，劏房嘅危險性，相信唔駛我多講。
此外，城市設施設計出錯，亦可以係死亡陷阱，尤其係公路嘅設計，如果有不妥善嘅地方，就隨時釀成嚴重嘅交通意外，例如喺03年7月發生21人死20人傷嘅巴士屯門公路墮橋事件，事後社會強烈質疑路段設計安全不足。同時，政府部門出現執法不嚴嘅情況，本港原本有一套大致齊備嘅法例，但如果有關部門執法不嚴，或者有法不依，即使有幾好嘅法例，亦都無用。南丫島海難就揭發出原來海事處喺審批及驗船工作上馬虎塞責。
我相信，政府應該訂立一套安全政策，作為政府施政嘅重要指標，喺安全政策下，去推動政府各部門做好預防意外嘅工作，推動安全嘅立法，及推動安全教育。當中，我認為最重要嘅工作，係做好安全教育，規定由細灌輸安全意識俾學生，養成一啲安全嘅習慣，包括防災、逃生及道路安全等意識。同時，推動安全嘅立法工作亦十分重要，目前本港並無安全政策，政府無必要主動為一啲涉及安全嘅問題做立法工作，最簡單嘅例子就係踩單車戴頭盔問題，正如之前所講，單車意外不斷上升，有不少人要求政府規定踩單車要戴頭盔，但政府不肯接納。如果本港有安全政策，政府就要根據政策方針，推動有關嘅立法工作，唔可以再有藉口拒絕。
至於短期嘅措施，我希望政府成立跨部門委員會，檢討現行涉及城市安全嘅法例，督促各部門改善執行情況。同時，可以參考審計署嘅運作模式，成立一個城市安全審查組，主動定期查核各部門嘅執法情況，研究相關嘅法例有無需要更新，並調查社會上唔安全嘅社區設施及設計，找出社會隱患。
民間方面亦可以作出貢獻，可以參考世界衞生組織「安全社區」計劃的概念，喺社區嘅層面上推廣安全文化。目前本港有九個社區參加，參加者各自就社區嘅特別情況，提出一啲宣傳、教育及社區活動，甚至會為學校、安老中心及社會中心提供安全教育，亦會向區內警察、消防及醫院提出改善工作嘅建議。我希望政府吸取有關嘅經驗，並且投入資源，支持本港各區參加計劃，從社區開始推動安全意識。