主席:
繼早前有議員提出要求教育局局長下台嘅議案後，今日再有議員提出對發展局局長及教育局局長不信任嘅動議。老實講，有關議案對當事人係極不公道。正如我早前所講，喺今日高度政治化嘅社會中，做局長真係」有抄家無封誥」，即使有能力，做局長都要有好大的勇氣同承擔，我相信真係要有好堅實原因，證據確鑿先至可以叫局長下台，否則係極不負責任的做法！
今日要求不信任陳茂波局長，最主要係源於所謂的劏房事件，陳局長頭先已經詳細解釋事件始末，我只係想講，如果我哋用而家好厭惡嘅劏房標準去套落十幾年前舊樓嘅板間房收租事件中，其實並不公道，亦不理性。
另外，有人認為局長係有意推太太去「孭鑊」，但我想問下各位議員，有幾多人夠膽去問太太有幾多私己錢? 或者有幾多私下的投資? 就算知道，請問有幾多人可以過問或者干預太太的投資行為? 老實講，今日香港不少夫婦，財政都係獨立，如果大家係專業人士，就更加各自有主見，只要唔係非理性的行為，一般都不會過問對方的行為。現在硬要講陳茂波搵太太「孭鑊」，根本就係「攞嚟講」，更何況時間上都「唔吻合」，唔通陳茂波為咗2012年做局長，就喺十幾年前做好準備，搵定太太去做代罪羔羊?
喺上一屆立法會四年中，我同陳茂波係並肩合作嘅戰友，對他嘅性格及能力，我好清楚。陳茂波具有潮州人克苦耐勞特質，做事投入、細心及要求高，佢做嘅事、事實嘅掌握都十分扎實，係難得有心、有能力嘅人才。目前，他處理房屋及土地規劃嘅工作，在極短時間內，已經能夠熟識及了解規劃地政嘅工作，而且他近期參與穩定樓市嘅工作，表現出色，足以反映他係一個有能力嘅好局長。以陳茂波具備嘅資深會計師資格，以至人脈關係、立法會嘅經驗同能力，從收入嘅角度嚟睇，做局長肯定係捱義氣，係為香港而作出嘅承擔，如果咁都要捱打，真係「無乜天理」。
至於教育局局長吳克儉的問題，我早前的議案都表示過，吳局長在處理國民教育事件中，無論在政治上及公關策略上，的確表現未如理想，但如果為此而要對他投以不信任票，未免過於嚴苛，因為整個國民教育計劃都係由上屆政府制定，雖說他係現任局長，但要他負上全責，肯定唔係公道嘅做法。
近期有言論指，香港社會出現咗對人不對事嘅情況，咁樣發展落去，可能有一日有隻雀仔飛過特首嘅辦公室，都可能俾人用「大炮射落嚟」！
本人謹此陳詞