香港自從回歸以嚟，社會出現咗唔少問題，當中包括貧窮及就業等問題，一直令到社會受到好大困擾。有多人都認為，經濟不景及經濟結構失衡係問題嘅主要根源，但其實有更深層次嘅原因，令到社會矛盾不斷惡化，就係本港無一個長遠人口政策，政府無做好人口變化嘅研究，自然難以訂出長遠嘅政策，當人口有新嘅變化及社會出現新嘅需要，社會矛盾不但唔可以及時解開，而且更變得日益嚴重。我已經多次向上屆及現任政府提出，本港必須要制訂人口政策，要清楚計算出本港人口承載能力，管理好新增人口嘅來源，從而針對教育、醫療、住屋及就業嘅問題，提出長遠嘅方案。可惜嘅係，回歸以嚟，政府一直都比較短視，亦可能無足夠嘅政治能量及魄力，去處理一個咁複雜嘅問題。
我過去已經多次分析過人口政策嘅重要性，今日我想集中講下，一啲需要我哋及早正視嘅人口問題。一提起人口政策，大家都會聯想到單程證問題，事實上，從回歸至今，已經有超過76萬名內地居民持單程證來港，佢哋大多學歷唔高，有約一半人係家庭主婦，所以呢方面嘅新增人口，無可避免會令本港基層人口大幅增加。不過，由於佢哋嚟港主要為咗家庭團聚，我哋唔可以剝奪佢哋嘅權利。所以，我哋喺呢方面嘅工作，只能夠為佢哋提供合適嘅生活配套，協助佢哋融入本港生活，亦都盡量協助佢哋提升上進嘅能力。
另一個新增人口嘅主要渠道，就係自然出生率，亦係人口政策其中一項重點。近年本港出生率回升，由2001年總共有4萬8千名嬰兒出生，逐步上升至去年有超過9萬名，而喺呢12年中，本港共有82萬名嬰兒出生，當中有20萬名為雙非嬰兒。
事實上，我哋港人自己所生嘅子女，應該係最自然嘅人口來源。所以，面對人口老化嘅問題，本港最需要嘅就係鼓勵市民生育子女，以補充本港嘅勞動力。當然，政府唔可以空口講白話，應該提出更多經濟誘因，去鼓勵生育，最直接嘅方法係增加子女免稅額，甚至為初生嬰兒提供資助。同時，撫養子女亦會有好多壓力，政府最好開設足夠嘅日間托兒服務，可以俾媽媽能夠安心工作，或者鼓勵企業為媽媽提供更多兼職、家中工作及彈性時間上班工作嘅機會，俾媽媽可以兼顧工作及管教子女嘅責任。政府甚至可以提供資助或進一步嘅稅務寬減，鼓勵媽媽選擇全職家中湊仔。
老實講，用納稅人嘅錢去鼓勵，或者獎勵市民生育，一定會引起社會嘅爭議，但若非如此，亦好難令出生率持續上升。根據政府估計，本港65歲或以上嘅長者人口，將由而家佔總人口一成多，逐步上升至30年後嘅三成，正式進入人口老化嘅高峰期，下一步亦會進入人口死亡嘅高峰期，如果我哋唔及早為30年後嘅社會著想，培養出具有競爭力嘅人口，以填補失去嘅人口，本港嘅競爭力一定會大幅下跌。
另一方面， 20萬名雙非兒童亦都係社會嘅計時炸彈。據了解，雙非兒童大多仍留在國內生活，我曾經提出建議，應設法追蹤雙非兒童嘅去向，了解佢哋打算幾時來港生活，以做好配套準備。我哋可以想像一下，如果20萬名雙非兒童到咗十多歲時，先至湧嚟香港讀中學大學，一定令社會混亂，佢哋亦未必能融入本港社會，所以政府要盡快想辦法處理好問題。事實上，政府應該認真研究，考慮採取更主動嘅策略，以政策鼓勵或提供經濟誘因，吸引有一定家庭經濟能力、或者唔需要依靠本港福利嘅雙非兒童，早日來港定居，俾佢哋及早接受香港教育，及早融入本港，而佢哋嘅家庭有一定經濟能力，佢哋早日來港，亦可以為本港即時帶來經濟效益。
最後，我想講下人口老化嘅問題，正如之前所講，本港長者人口將會不斷上升，當中會有大量中產或以上嘅長者，退休後雖然生活無休，但生活就容易變得無所事事，自然亦容易變得體弱多病。我認為，呢批長者係香港之寶，佢哋有學問有經驗，而退休初期仍然精力充沛，仍可以為本港做好多有意義嘅事，我希望政府可以推動呢批長者參加義工，鼓勵及安排佢哋到社區中心，教授基層兒童語文、音樂、理財及電腦等知識，或者提供功課補習服務，長者可以長有所用，將知識傳授下去，而亦惠及基層兒童，正好一舉兩得。